എന്റെ നാട്ടുവർത്തമാനങ്ങൾ

ശ്രീവിദ്യ രണ്ടാമതും പെറ്റു
പീടികകോലായിൽ കുമാരേ-
ട്ടനും, കോയക്കായും, ജോസഫും
ഒരുമിച്ചിരിക്കാൻ വരാറില്ല,
മുറിബീഡി കത്തിച്ച്
വലതുപക്ഷവും ഇടതുപക്ഷവും
ചവയ്കുന്ന ബുദ്ധിജീവി രാമേട്ടനും,
ഹാജ്ജ്യാര് മമ്മദും വീട്ടിൽ നിന്ന്
പുറത്തിറങ്ങാറേയില്ല.
രാജന്റെ കാമുകി, ഭാര്യയായി....
അടുത്ത വീട്ടിലെ ഗൾഫുകാരന്റെ..!
കലുങ്കിൽ ഒറ്റയ്കിരിക്കുന്ന രാജനു
ഭ്രാന്താണെന്നും പറയുന്നുണ്ട്.
എല്ലായിടത്തും ഓടിയെത്താറുള്ള
കൃഷ്ണേട്ടൻ ഒരു നട്ടുച്ചക്ക് പുഴയുടെ
ആഴങ്ങളിലേക്ക് നടന്നു....
ആഴങ്ങളിൽ മുൻപേ പോയവരെല്ലാം
അന്ന് തിരിച്ചുവന്നു. 

കുറച്ച് ദിവസം, ഇവിടെയൊക്കെ

കറങ്ങി നിന്നു .
എന്തൊക്കെയായാലും..!
അമ്മുക്കുട്ടിയമ്മ ഇപ്രാവശ്യവും
പഴനിക്ക് പോയി.
വിശേഷങ്ങൾ ഇനിയുമുണ്ട്

ശേഷം അടുത്ത കത്തിലാവാം.