വീട്

അച്ഛന്റെ സ്വരത്തിന്
കഷ്ടപ്പാടിന്റെ നിറം
പലതിന്റെയും വിലയറിയുന്നത്
ആ സ്വരം കേൾക്കുമ്പോഴാണ്
ആ നിറം കാണുമ്പോഴാണ്.
അമ്മയുടെ സ്വരത്തിന്
ഇല്ലായ്മയുടെ നിറം
ആ നിറം സ്വരത്തിൽ നിറയുമ്പോഴാണ്
ഇല്ലായ്മയുണ്ടെന്ന്
ഞാനറിയുന്നത് .
അനിയത്തിയുടെ സ്വരം നിറയെ
ആവശ്യങ്ങളുടെ
വിവിധ വർണ്ണങ്ങളാണ് ,
അതു കേൾക്കുമ്പോഴാണ്
അവളു വലുതായെന്ന്
ഞാനറിയുന്നത് .
എന്റെ സ്വരങ്ങൾക്ക്
ഇപ്പോൾ നിറം നൽകാറില്ല ...

ഓട്ടോഗ്രാഫ്

ചിതലെടുക്കട്ടെ,
നിന്റെ ശോകമാം പാട്ടും
മുറിയുന്ന മൗനവും
തീയെടുക്കട്ടെ,
രക്തം നിറച്ച്
വാക്കുകൾ കോറിയ
നിന്റെയീ ഓർമ്മപ്പുസ്തകവും
ചാരമാവട്ടെ,
നമ്മുടെ പ്രണയവും,
ഞാനും.....